A Kakantaninga Katorika n te Aonnaba nakon Rinean te Boobe ae Boou...

E korakora ngkai te ingainga n nano irouia teuana tabun te birion te Katorika n te aonnaba n ikotaki ma Kiribati n tataninga mwiin te rinerine ibukin aia Tia Kairiri ae boou n te Ekaretia ni Katorika n Room n onea mwiin Boobe Francis.

E Waaki te Rinerine ae Raba ibukin te Boobe irouia Karetinare ibukin kakaean Onean Mwiin Boobe Francis…

E moanaki te Rinerine ae Raba ibukin te Boobe irouia Karetinare man te bong are ngkoananoa, Meei 7, 2025, ngke a botaki 133 Karetinare inanon te Sistine Chapel bwa a na rinea te Ka-267 ni Boobe imwiin maten Boobe Francis.

E taku te Botaki ni Karekerongorongo ae te Associated Press, AP bwa e moanaki te botaki aio ma waaki n taromauri, n ikotaki ma te katiuea iaon bwaai aika tabuaki kaotinakoaia ao ai moanakin karaoan te rinerine.

E ngae n anne, ao e otinako te bubu ae roro man ana kai-ni-bubua te chapel are a botaki iai Karetinare n rinerine, are kaotia bwa akea irouia taani rineaki ae reke irouna uoua te katenimwakoro (ke 89) ni mwaitiia taan rinerine.

E baireaki bwa a na manga moan ikotaki riki Karetinare n te bong aio ae 8 ni Meei ibukin te manga rinerine riki.

Iai onoman araia Karetinare ake a kantaningaaki bwa a kona n riki bwa taan kauaba nakon te Nakoa ni Boobe ibukin Onean Mwiin Boobe Francis bwa Karetinare Pietro Parolin mai Itare, Karetinare Péter Erdő mai Hungary, Karetinare Luis Antonio Tagle mai Biribin, Karetinare Jean-Marc Aveline mai Buranti, Karetinare Fridolin Ambongo Besungu man te Democratic Republic of the Congo), ao ai Karetinare Matteo Zuppi mai Itare.