Kanakoa Ana Buoka te Ekaretia ni Kaitibong ae $100,000 Ibukin te Kanganga i Missouri

E a tia te Ekaretia ni Kaitibong n anga te tieke ae $100 te Nga te Mwane n Amerika ibukin buokan te kanganga iaon Saint Louis, Missouri, imwiin oreana n te angibuaka ae kamamate ae te tornado.

E butimwaeaki te tieke aio iroun te Meia iaon Saint Louis ae Cara Spencer inanon tain te Maungatabu n te General Conference n te Moanibong.

E a tia te angibuaka ae te tornado n uota te urubwai ae katautauaki bwa e nakon 1.7 te birion te mwane n Amerika, are a uruaki iai 5,000 kateitei, ao niiman aika mate.

E anga ana kakaitau te Meia ae Spencer nakon te Ekaretia ibukin te ibuobuoki aei ao e neboa rake aia mwakuri n ibuobuoki ae reitinako—iaon karaoan mwakuri ni kuakua, tibwatibwaan booki, ao te kaitiaki inanoni kaawa.

E taku te Tia Mwane n te Ekaretia ae Paul Douglas bwa te buoka aio e kaota ana nanoanga te Ekaretia ni Kaitibong ao ana motinnano ibukin buokaia aomata aika rootaki n te kanganga.

E raonaki te Tia Mwane n te anga-bwaintangira aio iroun Kautuun te Aro ni Kaitibong ae boou ae Erton Köhler ao taani kairiri riki tabeman.

E taku Meia Spencer bwa e rang kakaitau bwa aio bon tiaki ti kaotan te kukurei ma bon te karinimwane ibukin te kaawa aio nakon taai aika na roko.

E reitinako kanoan te Kaonobwi-ma-uoua ni Maungatabu n te wiiki aei n te Center Convention Complex, Amerika.

A Rin Ainen te Aro ni Kaitibong ao te Roronrikirake i Korobu n te tairiki aei

A na kaembwa ni moa man te tairiki aei i Korobu Aine, Roronrikirake ao kaain te Pathfinders n te Aro ni Kaitibong iaon Tarawa, ibukin aia katauraoi imwaain te Ikotaki n Taromauri n Aia Bong Aaro n te Kanimabong aei, 11 n Tuurai.

Te Ikotaki n Taromauri bon teuana kanoan ana Kabwi ma Onoua n Inaomata Kiribati, are e na botiia Kiritian ma aaro aika kakaokoro ni mwaneaban te Aro ni Katorika ae Santo Iotebwa i Teaoraereke.

E a tia n riki Aia Bong Aaro bwa te bong ni katiteuanaaki iaon Kiribati, are kaunga te raoi, te karinerine, ao te kaai n nebonebo n taromauri irouia Ekaretia aika kakaokoro.

E ngae n anne ao e na moa te bong ni motirawa ibukin te Inaomata ningabong, te Kaabong, are a kantaningaaki ana aobiti te tautaeka nako bwa a na in ibukin kauringaan te Inaomata iaon Kiribati.

A kantaningaaki bukamaru wba a ne reitinako inanon te wiikente, ao te bobotaki irouia aomata ibukin kauringaan te inaomata are reke n te ririki 1979.

Karinea te Ekaretia n te Aonnaba te Buraim Minitita mai Babua Nukin

E a tia ni katikia mataia Botaki ni Karekerongorongo te Buraim Minitita mai Babua Nukin ae James Marape n ana maroro are e anga n tain Ana kaonobwi-ma-uoua ni Maungatabu te Ekaretia ni Kaitibong.

E taku Buraim Minitita Marape bwa e rang neboa rake ana waaki te Ekaretia n te Aonnaba ibukin tibwangana are e anga n te burokuraem ni kabwarabwara ae te PNG for Christ.

N ana taeka are e anga n tairikin te Kanimabong, ao Marape e kaota mwaitin te babetito ae iaon Babua Nukin ae raka iaon 500,000 ao teuana te mirion te aomata ae kaota nanona n te Ekaretia ni Kaitibong n te waaki n otinako are 2024.

E taku Marape bwa man ana itera te tautaeka, bon te kakabwaia, ao n neboa rake aron te katiteuanaaki ae noraki iaon Babua Nukin iaan ana man Kuristo e ngae ngke e riaon 800 mwaitin taetaenikawai aika kakaokoro iaona.

E anene naba te Buraim Minitita ma te Footprints Ministry group ao e kaitaua te Beretitenti mai imwaaina ae Ted Wilson ibukin ana kairiri ao irakin te waaki iaon Babua Nukin.

Ao tiaki ti ngaia ma anga naba aia kaotioti taani kairiri man Tebetebeke Maiaki iaon te angakarea, te rikirake, ao noran mwiin te kaai ni mwakuri irouia kaain te Ekaretia ni kabaneia.