E teimatoa ana buoka TIAINA nakon ana botaki ni kanakobwana te Aro ni Kaitibong.....

N te ingabong aio ao e anga Tiaina te tieke ae $4,000 bwa buokan naba te karikirake iaon katiaan ana studio ni kanakobwana n te terewition.

E butimwaea aio te Director n Kiribati Adventist Media ae Tarataake Angiraoi mairoun Kang Ziyu man ana Embassy Tiaina i Bairiki.

E taku Tarataake bwa te mwane aio e na raona are e a tia ni kataumwaneaki ibukin te karikirake aio—are karaoaki mai iaan ana ibuobuoki te Kiribati Mition, te TPUM, ao SPD ao ni boutokaaki iroun Tiaina ibukia kaain Kiribati.

E taku Tarataake bwa ngke e moanaki karaoan te terewition ae boou, ao e a tia Tiaina ni buoka mwanenakin bwain nanon te studio ibukin te bwana ke taian acoustic panels—are a kantaningaaki bwa a na kanimwaki n te namwakaina aio.

Ao tiaki ti ngaia ma e a tia naba Tiaina ni buoka kamwanangaan te tia mwakuri temanna man Hope Radio bwa e na ira te reirei iaon te kanakobwana i Tiaina.

E taku naba Tarataake bwa ana kakao Tiaina nakon Maroro Irouia Mataniwiin Kanakobwana are e iria bon teuana naba te katoto iaon te irekenrao ae kakawaki, are kona ni buoka katamaroaan te kanakobwana i Kiribati nakon te tai ae na roko.

Man te ikarekebai ae reitinako aei, ao Kiribati Hope Media, e a kona n onika te mii nakon are bon te koaua—te kanakobwana teuana imwiin teuana.