E Ueke Te Nakonnano n Te Rongorongo Iaon Taren Te Raiti...

E A MANGA BUTI NABA TE RONGORONGO IAON TAREN TE RAITI ao ni manga kauekea naba te kaboo-raiti ae kaienikuri iaon Tarawa, atuun kaawan Kiribati.   

A mwaiti aomata ae a ikakaai ni kaei titooa ibukin karekean kanaia te raiti ae tau mai imwiin butin te rongorongo ae e nang bane te raiti.

Te kabo-raiti aei e aki ware teaina ma e ware uaai tennai ke e mwaiti riki te baeki-n-raiti—iaan te raraoma bwa mwiina e na aki manga reke riki aia tai ni kabo raiti ngkana e na maan te kaako are imwiina.

E a tia n riki te raiti bwa teuana te amwarake ae ai boni kanaia kaain Kiribati ae a tangiria, riki iaon Tarawa, are a maeka iai e riaon iteran te botannaomata, n te aro are e a riki te raiti bwa oin kanaia ao maiuia.

E a tia te buti-n-rongorongo aei ni kauekea te raraoma irouia aomata tabeman ao iai ae a taku n aia katautau bwa tao bon aia waaki kambwana ni kao-kaako ni kataia ni kabanea aia raiti ni kawai ake a tuai bane imwaain rokon aia oota ae boou.

E aki toki te tautaeka n anga ana karaunano nakoia ana botannaomata n te tai are e buti iai te rongorongo iaon te tare n raiti bwa e bon tau n taai nako mwaitin te raiti ibukin kaitaraan te kainnano imwaain manga rokon te kaako are imwiina, ao e riai n akea te nakonnano.

N te tai aei ao e a  tia te Aobiti are tabe ma te Iokinibwai ni kamatoa ae e aki tare te raiti, ao e kantaningaaki rokon te raiti are imwiina ni Maati 8.

E ngae n anne ao e boni korakora naba te raraoma irouia aomata n taren te raiti n te aro are a waekoa ni kakaei titooa ma kambwana ni kao-kaako ibukin karekean kanaia.

A mwaiti ae a taku n aia katautau bwa kabutan te rongorongo iaon taren te raiti tao bon te anga ni karekemwane ae bon nanonaki.