Kanakoa Bwanaana ni Kaunga Mataniwiin Kiribati Hope Media Ibukin Karikirakean te Kaneweaba N Taabo aika iai Rongorongoia iaon Kiribati….

Korobu, Tarawa -

E a tia te Director n Kiribati Hope Media ae Tarataake Angiraoi ni kaunga Kiribati bwa e na kateimatoa nanona ni kani kawakina ao ni katanoatai ana tabo aika iai rongorongoia aika kakaongora, bwa e rang kakawaki ibukin anaakin nanoia taan neweaba mai tinaniku n roko ao ni karikirakea kaubwain Kiribati n anga aika bati.

E kanakoa ana taeka aio Tarataake imwiin okina n ira te Bwabwaro irouia Mataniwin Botaki ni Kanakorongorongo man aba aika 23 n ikotaki ma Kiribati are e karaoaki ni mwakoron Tiaina aika teniua.

Inanon kawarakin Tiaina aei, ao a kairaki taani Karekerongorongo nakon taabo aika rang kakaongora rongorongoia iaon Chongqing, Changxin, ao Beijing—n ikotaki ma Ana baereti te Emberoa ae te Palace Museum ao te Revolutionary Museum, are a karaoaki mai iai babaire iroun Mao Zedong ma te Chinese Communist Party ibukin buakanakin Tiabaan.

Ao tiaki ti anne ma e nora naba aron are e tia ni kabanea Tiaina ibukin kawakinan ana rongorongo aika kakawaki n rairi taabo aikai bwa taabo ni kaneweaba aika rang kakamataku.

Man noran aikai ao e noria Tarataake ae Kiribati bon iai naba ana tabo aika rang kakaongora rongorongoia ma a tuai rang ni karikirakeaki raoi, n ai aron ruanimaten Rairaueana iaon Tabiteuea Maiaki, te kabinounou are i Kuuma, Butaritari, are angkoa e aerake mai iai Butaritari mai kabini marawa, ao a mwaiti riki.

E taku Tarataake bwa ngkana a kawakinaki raoi taabo aikai ao ni katamaroaaki ao ni karikirakeaki man katanoataaki, ao a kona n riki bwa taabo ni kaneweaba n rongorongon Kiribati—ao ni kona ni kakorakora riki iai kinaakin Kiribati ao ni karikirakei naba aroia kaain te aba.