Karinea te Taabati te Minita Ibukin te Akawa mai Nauru Imwaain Bowiin PNA

Nauru Fisheries Minister, Hon. Reagan Winson Aliklik; Photo: Courtesy, Government of the Republic of Nauru.

Inanon te waaki n onimaki ae riaon tuan te Nakoa, e a tia te Minita Ibukin te Akawa mai Nauru ae Honourable Reagan Winson Aliklik ni katikui tabena ni kabane iaan nakoana ao ni kawakina te Taabati ao n taromauri ma kaain te Ekaretia ni kaitibong i Kiribati."

E roko te Minita ibukini kaean aia Boowi Minita man Aban PNA ae boo i Tarawa n te wiiki aei, ao n te Taabati ae 31 n Meei, e a tia the Minita ni kamaunai wewete ma tabena n te tautaeka ao ni kawakina te Taabati ma kaain te Ekaretia ni Kaitibong iaon Korobu.

E boni ngae ngke e rang ribwa ana tai imwaain te boowi, ma e kabanea ana Taabati te Minita n taromauri, ao ni katawanou ao ni maroro ma kaain te Ekaretia.

N ana kaotioti are e anga, ao e kaota aron moan noran te onimaki ni Kaitibong irouna ngke e reirei i Isalei, Biiti, ao n okina nako Nauru ao e a boni kakawakina naba te Taabati—e boni ngae ngke bon ti ngaia n taua ana koaua anne ni mwengana i Nauru.

Boni ngaia naba are e anga abana bwa e na kateaki iai ana umwantabu te Aro ni Kaitibong iaon Nauru.

E taku Honorable Aliklik bwa e a tia ni kaitarai kauntaba aika bati n te Autintei, n ikotaki ma waaki ni kakamaku nakoina ibukin rawana ni mwakuri n te Kaonobong.

N te taina ao e tuangaki bwa e na tuea iaon te Baibara, ma e aki katoka baina iaon te Baibara ma e a kauka naba te Baibara ni wareka te koaua iaon te Taabati.

Iai naba te taina ae a baireia angiia kaain te Autintei bwa a nang kamotirawa man te Autintei, ma e aki bwai naba te waaki anne ngke a boni bane n nakonako naba angiia kaain te Autintei n te aro are e aki bwaati te mwaiti ibukin kamotirawaana.

Right: Te Minita n te Akawa mai Nauru, Hon. Reagan Winson Aliklik inanon te Umwatabu i Korobu; Left: Te Tia Raitaeka, Pastor Titau Tavita, Tia Koroboki ni Kabuta, Kiribati SDA Mission.

N ana tai ni maroro ma kaain te Ekaretia i Korobu ao e kaota ana iango ibukin karekean te reitaki n i-wa-waaki imarenaia kaain te Ekaretia i Kiribati ao Nauru n te aro are a kona n roko kaain Nauru i Kiribati ao kaain Kiribati a nako Nauru ibukin karekean te iraorao ma te katiteuanaaki.

E kaukaki ana Boowi PNA n te wiiki aei, are a roko iai iaon Tarawa Minita man Botaki n Akawa man aba aika Tuvalu, Babua Nukin, Toromon, FSM, Vanuatu, Matiare ao Kiribati ibukin maroroakinan bwaai aika kakawaki n rekereke ma te akawa n te Aono.