Raka Iaon 120 Kaain Nanikaai ake a Ira te Tutuo iaon te Tioka ma te Rietata-n-rara....

E raka iaon 120 kaain te kaawa ae Nanikaai ake a ira te tutuo ao te maroro ibukin aoraki aika te tioka ao te rietata-n-rara ngkoananoa.

E kairaki te tutuo ae onoua te aoa aio iroun Nei Teera Katarake, te Health Director n te Kiribati SDA Mission, n raonaki irouia Ambassadors man te 10,000 Toes ao kaain te Ekaretia ni Kaitibong mai iaon Bairiki.

Ibuakon maroro ake e anga Teera nakoia aoraki bon aang ake a kona ni kakorakorai aoraki aikai ao aroia ni kona ni kauarerekei ke ni boni katoki.

E katerea naba Teera ibuakon ana maroro kakawakin bwaai aika waniua n aron – Te Kang amwarake aika baeranti, te kamarurung, te Mooi-Ran, karekean Otan taai, te taubaang man bwaai aika aki tau nakon te rabwata, karekean te ang ae raoiroi, te motirawa ae tau, ao ai onimakinan te Atua.  

E taku Beretitenti man te Mission President Pastor Taabua Rokeatau bwa mwaitin te aomata n roko n te tai aei man utu ao aro aika kakaokoro—e kaotia bwa te rongorongo iaon te marurung e riaon riki tian te katei ma te aro.”

E raonaki te tutuo ma anene ao tibwatibwaan te amwarake nakoia ake a tia n tutuo irouia ataein te Ekaretia mai Bairiki, are e katerea te kaai ni mwakuri ibukin marurungiia te botannaomata.