Roko i Abarao te Tutuo Ibukin te Tioka ma te Rietata-n-raraa

E reitinako ana waaki n tutuo iaon te tioka ma te rietata n raraa te Health Department man te Kiribati SDA Mission n te wiiki aei, ao e karaoaki ngkoananoa ibukia kaain Abarao ao taabo ake a uakaan ma ngaia.

E kairaki te waaki n tutuo iaon te tioka ma te rietata n rara aei iroun te Health Director ae Teera ma kaain ana tiim aika health ambassadors.

E taku Teera bwa tebubua tabun aomata ake a roko ni kaeka te kakao ibukin te tutuo are a kabutia kaain te Ekaretia ni Kaitibong mai Bikenibeu n te Taabati ae nako.

E aki ti karaoaki te tutuo ma e karaoaki naba te kabwarabwara ae mataata iaon aoraki aika uoua aikai ma aroia aomata ni kauarerekei ke ni katoki—are a noria aomata bwa e rang kakaongora.

E boboto kanoan te kabwarabwara aio ma mwiin ana wareware te mitiin ni katine are e a boni kaota naba te kanganga inanon te rabwata ao e a kona naba n anga ana katautau n am ririki are ko a roko iai ngkai ibukin te aoraki are mena inanon rabwatam. 

E anga naba ana bubuti temanna te tia mwakuri n te tautaeka ngkana e kona ni karaoaki te tutuo ae aron aei n ana tabo ni mwakuri, are e a kaota naba te nano ae korakora ibukin tangiran te marurung tiaki ti nakoina ma nakoia naba raona.

E katuruturua Teera te koaua ae e kakawaki te tutuo, ma karaoan nanon are otinako ni mwiin te tutuo, e a bon rang ni kakawaki riki.

A tuangaki uake a tia n tuoaki n te tai aei bwa a iri nanon taiani bitaki n anuan maiuia ake a tia n tuangaki ao a na manga tuoaki n noraki mwiina inanon nimaua te wiiki are a na manga okiraki iai iroun te tiim tutuo.

E oti man rokoia aomata bwa te marurung e teimatoa n riki bwa te moanibwai irouia aomata nako.