Tei Ana Park te Kauntira iaon Tewaarua, Teraina

TERAINA - LINE ISLANDS

E a tia ni waaki katean ana Park Te Kauntira N Teeraina n te matabaiawa nte kaawa ae Tewaarua.

Oin katean te Park aio bwa e na kona n riki bwa te tabo ni katantan nakoia te botannaomata n tain rokon kaibuke. E na kona naba n riki bwa te tabo ni katantan nakon kaakoo n tain te kakarau. E na konaa naba n riki bwa te tabo ni kamaangang ao ni picnic nqkoia aomata ke iruaa ake a roko iaon Teraina.

E kateaki te mwaneaba aio man bwaai ni Kiribati n reitaki ma nikiran nako ana bwai ni mwakuri te kauntira ake a mena inanon baina. E taku Nei Ata Ueanterube bwa bon akea te kataumwane iaon aio ma aio kanoan ana kakamwakuri te kauntira n Teeraina.

Iai te kantaninga bwa ngkana e nakoraoi ao e na kona n rent out te mwaneaba aio nakoia taan picnic, bitiniti, ao bon aomata riki ake ana kainanoa te katantan nte park aio.

Iai te katautau bwa ngkana e  reke mwanen te park aio ao e nang kona ni anga karaoaki te katamaroa nako iai nakon te bwai n imatang.

E kairaki te kateitei irouiia kabenta man te kauntira ao raonaki irouiia taan mwakuri ni kabane n te kauntira. E katautauaki bwa e na tia inanon 1 te wiiki te kateitei aei.