Tokanikai te Inaomata Ibukin Kawakinan Ana Taabati te Atua i Brazil:

Tiago Corte de Alencar man te atai, ao arona n takakaro n te Judo, Brazil.

E a tia te Boowi iaon Brazil ni kanakoa ana moti n irana Tiago Corte de Alencar, te rooia ae kaain te Aro ni Kaitibong ao te tia iranikai n te Judo mai São Paulo, n anganna te inaomata ni kawakina ana Taabati n te takakaro ae ted Judo.

De Alencar bon te Bare-Roro ke te Black Belt n te takakaro ae te Judo, ma e kaitara te kanganga ngke e a koteaki ana Taabati bwa ana tai ni karaoa ana ukeuke are e na angabeebwa iai.

Ibukina bwa te tia kawakina te Taabati De Alencar, ao e rawa ni karaoa ana kaboo ke n takakaro man bungintaai n te Kanimabong nakon bungintaai n te Kaonobong.

Ngke e aki kaekaekaaki ana bubuti man te Botaki n Takakaro ae te Judo, ao e a uota naba tangina nakon te boowi—tiaki ibukin ana kauntaba ma bon ibukin katanakin te inaomata n te onimaki.

Ao e kaotinakoa ana moti te Boowi ni butimwaea ana tang are e a tuangaki naba iai te Botaki n Takakaro ae te Judo iaon São Paulo bwa e na aki ti angan De Alencar ana tai n ukeuke teuana, ma e a kauka naba te mataroa ibukia kaain te Aaro ni kaitibong bwa a na kona ni karaoa naba aio.

A kaota kukureia taani kairiri n te Aro ni Kaitibong iaon Brazil n te moti aei are a taku bwa tiaki ti te tokanikai n te onimaki ma bon te tokanikai naba nakoia te botannaomata, are e a kauringiira naba ae inaomatan mataniwiin nanon te aomata bon te bwai ae eti—ao bon te tabe ae riai ni katanaki.