Waaki Unikakin te Ane (Corals) iroun te Botaki n Akawa

E A TIA NI WAKINAKI UNIKAKIN te ane ke te corals are kairaki iroun te Minita n te Botaki N akawa ae Honorable Ribanataake Tiwau ma te tiim ae kainaki irouia kaain te World Bank, taani mwakuri n te Botaki n Akawa.

Aio bon te moan tai ni karaoaki iai unikakin te ane inanon teuana te kaora n naman Tarawa. E rimwiiaki te waaki n ununiki aio ma te bootaki ae uarereke n mwaakena naba iai moan mwakurian te waaki aio ae na kateimatoaaki nakon boong rake aikai.

N ana maroro n katekeraoi Te Minita, ao e katerea ae tenaan ane ke corals bon ai aron arokan taari ao e nang mwaiti bonganana nakon kateimatoaan mataniwiin te aba, karekean te maeu, karekean te kareke tainti man kaubwain taari ao a mwaiti riki.

E kantaningaaki bwa e na kabuburaki te waaki aio nakon taabo riki tabeua ake a kakoauaaki bwa a rootaki rakaina e aonga n mwaiti ao n teimatoa te mari i taari.

E kaungaia ana rabwata nako te Tautaeka, NGOs ao bon naake a tangiria n kan buoka te waaki aio n anga baia nakon te manga ununiki are imwiina.