Manga Rineaki Riki Paul Douglas Bwa te Tia Mwane n te Ekaretia ni Kaitibong n te Aonnaba

ST. LOUIS, Missouri — Tuurai 6, 2025: 

E a tia ni manga moan rineaki riki Paul Douglas bwa te Tia Mwane ni Kautuun te Ekaretia ni Kaitibong ae te General Conference.

Mwaitiia ake a rineia bon 1,851 ao 47 ti aika aki.

Douglas boni kaain Jamaica, ao e a tia n riki bwa te Tia Mwane man Eberi 2021 ao ni mwakuri ma te Ekaretia man te ririki 1986, n reitaki ma 14 te ririki ni kaira Ana Botaki n Oteta te General Conference.

Inanon ana maroro are e anga ni manga rineana aei, ao e kakaitau Douglas nakon te Atua ao e berita bwa e na kabanea ana tai iaon Kabutan te Kaubwai Ibukin te Mwakuri.

E katuua riki ana maroro iaon taekan te kakaonimaki n tararuaan te mwane, aomata, ao bwaai n rabakau aika boou ibukin kabutimwakaan ana mwakuri te Ekaretia n te aonnaba.

Reke te Tia Koroboki Ni Kabuta ae Boou n te General Conference

ST. LOUIS, Missouri — Tuurai 6, 2025: 

E a tia n rineaki Rick McEdward bwa te Tia Koroboki ae Boou ni Kautuun te Ekaretia ni Kaitibong.

Rick bon te Beretitenti ngkoa ngaia n te Middle East ao te North Africa Union Mission man te ririki 2016.

Bon angiia taan tei nakon te Kaonobwi-ma-uoua ni Maungatabu ae a boutoka rineana nakon te nakoa aei n te mwaiti ae 1,630 ao ti 153 ake aki.

Ai 59 ana ririki Rick McEdward ao e a rang ni mwaatai n te mwakuri n taabo aika kakaokoro.

E rikirake iaon Saudi Arabia ao e a tia ni mwakuri iaon Palau, Sri Lanka, Biribin ao Lebanon.

N ana tai ni Beretitenti n te Aono ni Mainiku, ao e a tia Rick ni kaira ana waaki te Ekaretia n te aono ae rang matoatoa, ike e kauka te kanakobwana n te taetae n Arabia ao te reirei ibukia mitinare ibuakon te buaka ma tuan te aro.

E a onea ngkai mwiin te Tia Koroboki ni Kabuta mai imwaaina ao ni buoka kairan te mwakuri ni katobibiia te aonnaba irouia e raka iaon 22 te mirion taan onimaki.

E a Tia n Rineaki Erton Köhler bwa te Beretitenti ae Boou n te Tieneroo Kaonburenti

ST. LOUIS, Missouri — Tuurai 4, 2025: E a tia n rineaki Erton Köhler bwa te Kauangaun-ma-temanna ni Beretitenti ni Kautuun te Aro ni Kaitibong n te Aonnaba ae te General Conference.

E rineaki Mr Kohler inanon ana Kaonobwi-ma-uoua ni Maungatabu te Aro ni Kaitibong are karaoaki iaon St. Louis.

Mwaitiia ake a rinea Mr Kohler bon 1,721 ao ti 188 ake aki rineia.

Köhler boni kaain Brazil, ao ngaia te moan aomata mai Amerika Maiaki ao te kauoman n tia kairiri ae kaain te itera are mai maiaki n reke nakon te nakoa n tia kairiri n te Aro ni Kaitibong n te aonnaba.

E a onea mwiin ngkai te Beretitenti mai imwaaina ae Ted Wilson, are e a tia ni kaira te Ekaretia ni Kaitibong n te aonnaba inanon te maan ae 15 te ririki.

Ni butimwaean te mwioko aei ao e kaota te nanorinano Köhler ma te katan i Roun te Atua, n taekina te kibu are n Itaia 41:10 ao e karabwaia kaain te Ekaretia n te Aonnaba—n ikotaki ma ake a kaokoro n iango n taku bwa kaain ana utu ni kabane.

E a tia Köhler n riki mai imwaaina bwa te Tia Koroboki ni Kabuta ao te Beretitenti n te South American Division, are e kaira rikiraken te itoman n te kanakorongorongo ma te mwiokoaki.

E rang katuua te taratara ae katabangaki Kohler n taku bwa aki kona n tabe n ti aia kainnano inanoa; ma a riai n tobwai kanganga n te aonnaba ibukin katiaan te mwakuri ibukin te euangkerio.