E a Kona te Tia Wanawana ae Boou ae AI n ata Rikin te Toki-ni-Buroo 10 ae na Roko.

E NAKORAOI MWIIN TE WAAKI NI KABONGANAAKIN TE TIA WANAWANA AE BOOU AE AI ni karaoan te kataratara ae moantaai ibukin ataakin te Aoraki ae te toki-ni-buroo ao karaoan te korokoro nakon te aomata tebwiina te ririki imwaain are e na riki.

Aio bon te kukune are kaotinakoaki man te Kuura ae Rietata ae rang kinaaki ae te Oxford University are kabonganaaki iai te AI scan ibukin buakanakin t eaoraki ae te toki ni buroo iaon Buritan.

E riaon teuana te ririki are e kataaki iai te rabakau ae boou aei inanon onaoraki tabeua iaon Buritan ao e oti bwa e boni kona ni moantaai n noraki te toki ni buroo tebwiina te ririki imwaain are kaoti iroun te aomata, man noran kanikina aika raba n tain te CT scan.

Inanon te tutuo are karaoaki nakoia 744 te aoraki, ao e kaniia ae bon iteran te mwaiti anne ae a moana naba aia bwainaoraki imwiin rinanoan aia tutuo iroun AI.

A taku taan rabakau bwa aio are e a kona naba ni kauarerekea mwaitin te toki ni buroo ma aoraki ake a rekereke ma ngaia n te mwaiti ae riaon 20 te katebubua.

E a tia ni kabwaataki te bwai n tutuo aei ibukin kabonganaakina n onaoraki iaon Buritan ao Eurobe ao e atongaki bwa e booraoi ao e kona ni kakamaiu.

Iai te kataratara nakon taai aika na roko irouia taan rabakau bwa a na kona ni kabongana naba te AI aei ibukin kaotakin aoraki aika te boo ao te tioka babobo, are e a kona naba ni kauka te mataroa ibukin kabonganaakin te bwai n tutuo aei ibukin totokoan aoraki ake tabeua.

Ma iaon Buritan, aio e a riki bwa te mwaneka ae kakawaki ibukin ataakin te aoraki ae te toki ni buroo ni moantaai.

Boraraoi Ibukin Kamanoaia Ataei n Tain Kabuanibwai Aika Karina

E a tia te Botaki ni Botannaomata ibukia Ataei ae UNICEF ao te Pacific Catastrophe Risk Insurance Company n tiiaina te Boraraoi ibukini karaoan te katantan ibukia ataei n Tebetebeke inanon tain kabuanibwai aika karina.

E taku te Rongorongo man UNICEF bwa e kantaningaaki te boraraoi aei bwa e na anganiia kaain te aono te kona ni kaitarai kabuanibwai aika karina—are e na moanaki moa man te tabo n reirei.

Te taakete bon taian reirei n ikotaki ma reirei ibukia ataei ake a uarereke bwa aonga ni kona n tei ao n rinanon kanganga aika karina n akea te kanganga.

E taku ana tia tei UNICEF n Tebetebeke ae Jonathan Veitch bwa e boboto te waaki aei iaon tarakiia ataei aika uarereke bwa a na aki tiku imwinta inanon tain kabuanibwai aika karina.

E reitia te CEO man PCRIC ae Aholotu Palu n taekina te waaki aio bwa boni "katean te oo ae mano iaan waeia ara ataei aonga ni kona ni kaitarai kabuanibwai aika karina.

E na tomaaki te waaki aio n te kaai ni mwakuri ma te botannaomata ao botaki ake iai tabeia ibukin kawaekoaan kabwakaan mwaane ni kabomwi, ao ni karina naba iai marurungiia, kanaia, te WASH, ao tieweti riki tabeua ibukin katanakiia ataei nakon taai aika na roko.

Aio are e a mwaakena naba ewekan te moani mwaneka ibukin katanakin inaomataia ao kabwaiaia ataei iaon Tebetebeke.

E a Reke te Bwainaoraki Ibukin te Kaentia n te Mamma irouia Aine ao E Nakoraoi...

E a tia n reke te bwainaoraki ae boou ae kona ni kamaunanakoa matan te kaentia irouia aine ni mammaia.

E taku te New York Post bwa e a tia ni kataaki te iti ae boou aei ao e raka iaon 75 te katebubua ni mwaitiia aine ake a itinaki ae oti bwa a na aki kona n rotaki n te aoraki aei.

E kuneaki te bwainaoraki aei iroun te Anixa Biosciences ao te Cleveland Clinic, ao taaketenaki iai te kaentia n te mamma ae te triple-negative breast cancer.

Aio bon te kabanea ni kakaiaki ni kaentia — ao e mwakuri man reiakinan te bwainaoraki aei bwa e na buakana te protein ae aranaki bwa te alpha-lactalbumin, are nonoraki tii inanon te mamma ae kaentia ao n tain te bikoukou ke te kammama.

E karaoaki te moani kakatai aei nakoia teningaun-ma-niiman aine ao e mwanenaki man te U.S. Department of Defense.

A ribotinna taan rabakau bwa akea mwiin te iti aei ma bon ti teutana mwiina n te tabo are itinaki.

Ngkana arona bwa e nakoraoi mwiin te kakatai aei, ao e a kona naba te bwainaoraki aei n totokoa ao ni bwainaorakiia te kaentia n te mamma, are rereke irouia aine, temanna ibuakon waniman ni katobibiia te aonnaba.

E taku Dr. Amit Kumar, te CEO n Anixa bwa aio bon te mwaneka ae moan te kakawaki, ao e taku bwa n te bong teuana ao a kona ni kamaunanakoa te kaentia n ai aron are a karaoia nakon te polio.”

E kantaningaaki bwa e na waaki Kakatai Mwakoro uoua n te ririki ae na roko, ike a nang manga noraki aekan kaentia n te mamma ake tabeua.