Katauraoi Kiribati Ibukin Katamaroaan Ana Intanete Rinanon te Karikirake ae te East Micronesia Cable..

E a tauraoi Kiribati ni mabiao man te karikirake ae bubura iaon te itoman n te intanete, ngkai e reitiia ana kauatabo mai Aotiteria, FSM, Nauru, Tiabaan ao Amerika ni maroro i Tiabaan ibukin te karikirake aio.

A boowi tautaeka aika onoua aikai ni manga rinanoia bwa a bwaka ia ngkai n te Keeboro ae biri i antari ae 2,250 te kiromiita abwakina, are nang riai ni maiu n Nobembwa 2025.

E reke naba ana tai ana tiim Kiribati ni kawara ana tabo ni karaobwai NEC Corporation iaon Otsuki, te tabo are a karaoaki iai bwain te Keeboro aei.

E moanaki katokaan bwaai aikai iaon te kaibuke ae te Normand Clipper inanon Meei, ao e na moa kanimwana inanon Tuurai.

E mwanenaki te karikirake aei iroun Aotiteria, Tiabaan ao Amerika, ao e kona n anga te intanete ae e a birimwaaka riki, n onimakinaki riki, ao ni booraoi riki nakoia tebubua tabun te nga te aomata iaon Tarawa, FSM ao Nauru.

E anga Aotiteria 60 te mirion nakon te karikirake aei rinanon ana mwane ibukin riin karikirake n Tebetebeke.

Ngkana e tia aei, ao e kantaningaaki te Keeboro aei bwa e na onika aron te waaki n reitaki irouia kaain Tarawa Teinainano, ni katamaroai riki aaro n reirei, tararuaan te mauri, bitineti, ao ai bon te itoman ma te aonnaba.

Te Moan Bong Ni Motirawa i Kiribati Ibukia Bureitiman

E karaoa ana moani bukamaru Kiribati ni karinea Aia Bong Bureitiman Iaon Kiribati n te Kanimabong ae nako, 23 n Tuun, ma te borein ae kakamataku n ana etekuata te Ikotaki ni Bureitiman are i Betio.

E a riki naba te bong aio wba te bong ni motirawa iaon Kiribati.

E karaoaki te bong ni motirawa aei bwa e na kauringa ana mwakuri te Botaki ni Bureitiman iaon Kiribati ao n anga te karinerine nakoia bureitiman ake a tia ni mate inanon karaoan nakoaia.

Iruwa aika rine bon Kautuun Kiribati, His Excellency Beretitenti Taaneti Maamau, N ikotaki ma te Moan Aine ae Madame Teiraeng Maamau, taan tei man aban tinaniku ake a aobiti i Kiribati ao tabeman riki.

Inanon kaotan te katiteuanaaki, a tei aobitia man te Botaki Ni Bureitiman mai Aotiteria ae te Australian Federal Police (AFP) irarikiia bureitiman mai Kiribati, ngkai a bon tia ni kaai ni mwakuri teuana ibukin barongaan kanoan te bukamaru, n ikotaki ma kataneiai n te mwaati, tein te mwaati ni kurubu, ao aron naba te mwaati n tain te mate.

E ibuobuoki naba te AFP ni karaoan te manual ibukin te kataneiai te mwaati ibukin boutokaan karikirakean rabakaun te Ikotaki Ni Bureitiman i Kiribati.

Ngkai e rikirake mwaitin ana botannaomata nakon 120 te nga ni maenako iaon 33 atimwakoro, Kiribati e kina tibwangan te Ikotaki ni Bureitiman ae moan kakawaki ibukin kawakinan te rau ma te mweraoi.

E a tia Tiaina ni Bwaintangira KCF tewaaana te Pick-Up Truck

E a tia n reke iroun te Botaki n Ibuobuoki ae te Kiribati Charity Foundation, KCF te bwaintangira ae tewaana te pick-up truck mairoun te tautaeka n Tiaina, ibukin kakorakoraan ana waaki ni boutokaia ataei ma utu iaon Tarawa.

N ana taeka te tia tei man KCF are e anga ni butimwaean te bwaintangira aei, ao e anga ana kakaitau ae moan te taka-burinako nakon Ambassador Zhou Limin ibukin ana ibuobuoki Tiaina ae teimatoa.

E a bon tia naba n anga Tiaina nakon te botaki aei bwaai ni mwakuri n te aobiti ae a rang kakawaki iroun KCF ibukin ana mwakuri.

E moan tei te Botaki n Ibuobuoki ae KCF iaan ana kairiri te Moan Aine ae Madame Teiraeng Maamau, ao e kateaki irouia taan anganano ao bon te moani botaki n aekakina i Kiribati—are e boboto ana waaki iaon katokan te maiu ni kainnano ma kanganga irouia te roronrikirake n taabo aika kauaomata n aron Betio, Teaoraereke, ao Bikenibeu.

E neboa rake te bwaintangira aei KCF bwa te bwaintangira ae riingi maiuia ataei ma te roronrikirake, ao motikia n ana taeka ni bau Kiribati are te Mauri te Raoi ao Tabomoa.